Նոյեմբերի 14-ին ՌԴ Ստավրոպոլ քաղաքում Հյուսիսկովյասյան դաշնային համալսարանի կազմակերպած համաժողովին մասնակցում էին բազմաթիվ ասպիրանտներ, մագիստրանտներ և ուսանողներ Ռուսաստանի  դաշնությունից, Հայաստանից և Վրաստանից: Հայաստանից ՀՀ ԳԱԱ պատմության ինստիտուտը ներկայացնում էին տնօրեն Աշոտ Մելքոնյանը և գիտաշխտող, պ.գ.թ. Հենրիկ Խաչատրյանը, Խ. Աբովյանի անվան Հայկական մանկավարժական համալսարանը` պրոֆ. Խաչատուր Ստեփանյանը և պատմության ֆակուլտետի մի խումբ ուսանողներ, Հայաստանի ազգային արխիվը` պ.գ.թ. Վարդիթեր Գրիգորյանը: ԵՊՀ-ի պատվիրակության կազմում էին ուսանողներ պատմության և միջազգային հարաբերությունների ֆակուլտետներից:

 

Համաժողովի մասնակիցներին ազգային տարազներով, երգ ու պարով դիմավորեցին տեղի ռուսական, հայկական ու վրացական համայնքների մշակութային խմբերը:

Լիագումար նիստում «Հայաստանը Ռուսաստանի արտաքին քաղաքականության ոլորտում 19-20-րդ դարերում» զեկուցման մեջ, ապա նաև «Ռոսիա» հեռուստաընկերությանը տված ընդարձակ հարցազրույցում ակադեմիկոս Մելքոնյանը կրկին անդրադարձավ Ադրբեջանի կողմից բռնազավթված Արցախում հայկական պատմամշակութային ժառանգության ոչնչացման քաղաքականությանը, ներկայումս հայ-ռուսական հարաբերություններում առկա խնդիրներին:

Պրոֆեսոր Իգոր Կրյուչկովն իր զեկուցման մեջ ընդգծեց, որ  Ռուսաստանի 19-րդ դարի տնտեսության մեջ Անդրկովկասը, մասնավորապես Արևելյան Հայաստանն ու Վրաստանն ունեցել են կարևոր դերակատարություն:

Ռուսաստանում Հայ եկեղեցու նկատմամբ 19-րդ դարում տարվող քաղաքականությանը նվիրված զեկուցմամբ հանդես եկավ Վարդիթեր Գրիգորյանը:

Հայկական պատվիրակությունը ծանոթացավ նաև տեղի համալսարանի հայազգի դասախոսների ու ուսանողների հետ, այցելեց Ստավրոպոլի հայկական եկեղեցի, «Նաիրի» մշակութային միություն, ապա մեկնեց  Պյատիգորսկ: